رسالة الى الرئيس عمى الريس.. بقلم عبد الهادي الشعرواي
رسالة الى الرئيسعمى الريس
….
عايز حقى وحق بلادى
م اللى هبشوا حق ولادى
وبقوا طبقه علينا قوية
عايز أحس حلاوة الحاضر
واللا هكون دايما مش قادر
يكفى الماضى والتبعية
عايز قلمى يترك خوفه
يكتب يرسم كل حروفه
من غير قيد و بحريه
عايز أعلى بصوتى وأقول
تحيا جمهورية مصر العربية
عمى الريس ……
عارف إنك عمال تبنى
وياجيش عمره ماهَيسيبنى
وهَنتحمل لأجل ما نجنى
بس الحالة صعبه شويه
الفواتير كلها فى زيادة
والدخل أهو رايح كالعادة
على مصاريف مدرسة وعيادة
وعيونهم مش شايفه عينيه
عمى الريس والله قضية
عايزه نظرتك الأبويه
عايز أعلى بصوتى وأقول
تحيا جمهورية مصر العربية
عمى الريس ….
متخرج زى الملايين
عمرى خلاص قرب ستين
ولا ليًا غير دخل إيدين
طب أعمل إيه فى القوانين
وكأن شروطها مش فيه
نفسى الفجر عَليًا يعدى
يرسم ضحكة راحة ويهدى
حلمى أعلم بنتى وإبنى
من غير قيد وبحرية
عايز أعلى بصوتى وأقول
تحيا جمهورية مصر العربية
عمى الريس ….
أنا ابن راجل م الجيش
ولحد النهار دا بعيش
على خيره وراضى بالعيش
مع إنه خلاص ساب الدنيا
ربانى لبلادى أعيش
وأحب وطنى والجيش
ولا أشكى من طعم العيش
مهما مالت الدنيا عليه
عايز أعلى بصوتى وأقول
تحيا جمهورية مصر العربية
عمى الريس
محدود الدخل أهو بيعانى
والمعدوم بقى مجنى وجانى
والتعليم ماعاد مجانى
وولادنا محتاجة أمانى
لأجل عقولهم تفضل صاحيه
وبعيده عن أى أذيه
بص على الاعلام وعمايله
والافلام الهابطة الدايرة
والغنوة اللى ماهش مفهومه
بتدمر أولادنا فى ثانية
ومصدره لينا الف قضية
عمى الريس إحمى بهيه
علشان تبقى قد الدنيا
عايز أعلى بصوتى وأقول
تحيا جمهورية مصر العربية
عمى الريس
ممكن كلمة فى ودنك
أقولها وبعيد عنهم
بص شوية على القوانين
بعيونك إنت مش بعيونهم
هم بسرعة إحنا فى حرب
طهر الوزارات م القلب
إغضب قبل الشعب ما يغضب
الأفعال كلها بتدينهم
عايز أعلى بصوتى وأقول
تحيا جمهورية مصر العربية
عمى الريس
دى رسالة أب مع عيلة
عاشق مصر أرض وعيله
نفسه يكون لإبنى ضليله
أقبل ما أسيب الدنيا الفانية
عايز أعلى بصوتى وأقول
تحيا جمهورية مصر العربية