ماتاه مجنون.. زجل حر بقلم فؤاد البياز القاسمي

صنف زجل حر

ماتاه مجنون

ما تاه مَجْنونْ في سْوالَفْ لعَشْق
مَنْ بَعْد ما فْتَل ضْفيرَة هْبالو
ما دَقْ باب لمْوالَفْ مَنْ حيلْتو
و كْتَم سَرّو في المَخْزون.

نْهار حَلّيتْ عَيْنِيّا
حلاّتْ لَقْصيدَه فُمْها
وَكنْت سْنان لَحْليبْ
كانْ لحَرْف يَحْلَف ايمانو
هازْصُبعو شْهاده
يَشْهَدْ بِلْمْحَبَّه في
سْرار حَلْق لَمْتونْ.

هازْ صُبْعو شْهاده.
عللٍي كانو جِيرانْ
وفيهْ خاوَه.. حُب وإفادَه.
وَقلْت أنا اللّيفْ
وقالتْ هِي الْبا
وكَنّا في مَحْرَك لَكَتْبَه
غوْث بسَرْ مَدْفون .

ياسيدي
كانَت صَرْخَتي فْريدة
ما شَرْكَتْ(g) سْما
ماطْوات أَرْضْ
غي عَطْفَه.. مايلة على شَمْس
تضوّي في حيرِةْ لْبَكْمَه
مْقَيْدَة(g) في وْطا مَدْهونْ .

قالتْ لَّحْ!. وَقَلْت لَّحْلّّحْ
وَكنْت اللَّحْلاحْ
في سوقْ الَمْلاحْ
نكَيَّل ظْنوني بالكيلو
وَنَحْرَقْها في كِيّْتي بمائة قَنْطارْ
ماعَدْموني بالسَّمْ ماحْيَوْني بالرْباحْ
والضُّرْ في عُنْقي بألْفْ طونْ.

ياسيدي
حَنْحَنْت بالْعَيْط في الصّْدورْ
كِعَوْد كُمْري لَجْموهْ بالْعْطورْ
كِطَيرْ نَبْلي كَبْلوهْ بالبْخورْ
كناظَمْ قلْبي حايْزاه السّْطورْ
وخَلّيتْ كلامي خَزْ في
صْدَرْ مَغْبونْ.

دَقّيتْ بيبانْ الزّينْ وينْ يِبانْ.
وسَوّلْت فينْ فينْ نَلْقى مُرادي
فَلْجَة لَمْحاسَنْ تْلوحْ مَنْ السّْنانْ
وخْدودْ لَعَزْريه فَتْنَتْ مْقاصْدي
بلْحْلوف كان العاشَق مَفْتونْ.

راحَتْ الشّمْس في ضَيّْها غَضْبانه.
ورْحْت في روحي مَنْها عَطْشانَه.
ولاحَتْ لَمْحَبّه في صْدور الَمْحَنَّه
خَيَّطَت مْلاحَفْ مَنْ مْعاني الكَانَه(g)
وَرْواحي مْحَيبقْ رْواتو لَعْيونْ.

فؤاد البياز القاسمي