شُروقي (البحر البسيط) بقلم .. الشّاعر : جمال الخطيب

شُروقي (البحر البسيط)

أَلْكَلامِ الْمُباحْ
**********

إِلضِّيقْ بَعْدو فَرَجْ وِالّليلْ بَعْدو نْهارْ

مَرَّه عَليكِ الدَّهِرْ مَرَّه مَعَكْ جايي

إِرْمي وَراكِ الْحُزُنْ وِتْحَزَّمِ بْإِصْرارْ

وِرْفَعْ شِراعِ الأَمَلْ تَتْحَقِّقِ الْغايي

****************************

أَيّوبْ لَمّا صَبَرْ فاتِ الأهِلْ وِالدَّارْ

في غارْ عاشِ الْوَجَعْ ما نَكَّسِ الرَّايي

وِبْعونْ واحِدْ أحَدْ رِجْعِ ابْتَدَى الْمِشْوارْ

تَيْكونْ لَهْلِ الصَّبِرْ طولِ الزَّمَنْ آيي

******************************

تاريخْ كُلّو عِبَرْ . لَهْلِ الْفِهِمْ تِذْكارْ

وِالْهَمّْ مَهْما بَلَغْ بِتْكونْلو نْهايي

شُفْنا بْعِنينَا الْفَرَحْ أيامْ كُنَّا صْغارْ

وِاليومْ أصْبَحْ حِلِمْ بِسْطورْ لِحْكايي

*******************************

وَاللهْ.. مَهْما خِلِقْ.. في هَالزَّمَنْ أَحْرارْ

مِثْلِ الْفِدائي الأَبي.. ما وَلَّدَتْ دايي

دَمُّو الطَّهورِ الزَّكي زايِدْ حَلا النُّوَّارْ

لَبَّسْ ثِيابِ الأَلَقْ لَلْأرْضْ تِجْلايي

******************************

ما كانْ بيدِ الشَّعِبْ تَغْييرْ هَالأَقْدارْ

وِحْنَا قَدَرْنا تِجي .. لِهْمومْ تِوْصايي

تَنْعيشْ تالي الْعُمُرْ ما بينْ نار و نارْ

نِنْطُرْ عَمَفْرَقْ أمَلْ تَنْشوفْ لِنْهايي

*****************************

ما بينْ مَجْلِسْ أَمِنْ . ما بينْ قِمِّةْ عارْ

لاكَتْ حِكايِةْ شَعِبْ بالزُّورْ تِسلايي

حُكّامْ مَتْأثَّروا رَغْمِ الّلي فينا صارْ

حُكَّام مِثْلِ الصَّنَمْ بِالثِّمْ صُرْمايي

***************************

……… الشّاعر : جمال الخطيب .